أخبار عاجلة
الرئيسية / من أعماله / قصائد / شعر عامية / يا عمّ الشعر – خالد الشيباني

يا عمّ الشعر – خالد الشيباني

يا عم الشعر سيبني ف حالي عايز أنام
كلامك ده يدخلني حقول ألغام
و أنا باتمنى أعيش ف سلام
بتكتب ليه بفتح الغين وإظهار السكون ع الميم
ليه تكتب غَمْ
عشام محروق على بلدي اللي حالها يُغم
عشان مخنوق من التوهة اللي تايهنها
عشان مصر اللي زعلانة و طفشانة وسايبانا و لا قالتلنا فينها
هيعمل إيه علم مرفوع
إذا ما الشعب مات م الجوع
و نعمل إيه بسكرنا و إزازة زيت
لو المدفع بيضرب كل يوم البيت
ما بين نارين كما المعتاد ..و ألف علامة استفهام
بَطَلْ يا عم نشهدلك
مسكت الحكم فين عدلك ؟
بينزل حدنا الأدنى
محدش هامه كام خدنا
و ممنوع نعترض لو حدهم أقصى
و منسية هموم القدس و الأقصى
تقيل الحمل مش ناقصة
بلاش دلوقتي حق الشهدا
مسيرة ترجعه الأيام
م تعمل حاجة يا ريس م تتكلم
متحسبهاش كما المخلوع تقوللي معايا شرعية
م تحسبهاش كما المعزول تقول الأمن متحكم
عشان الشعب لو فاض بيه
لا فارقة معاه و لا ديا و لا ديا
يا مجلس شعب متخفي
كإن جوازنا بيه عرفي
بتعمل إيه .. صباحك فل
يا مجلس وزرا كل يومين يحط قرار
يولع كافة الأسعار
و أعصاب الجنيه تنهار
إذا قدامه قالوا دولار
منورنا يا سيد الكل
خلاصة القول يا ريسنا
يا حامينا و حارسنا
إذا مسئول يرد عليك بكله تمام
تكتبه الاستقالة قوام
عشان عايز يبيع أوهام
كفاية كده
يا عم الشعر سيبني ف حالي عايز أنام

يا عم الشعر

خالد الشيباني

شاهد أيضاً

رسالة لرئيس الجمهورية – خالد الشيباني | إلقاء : سامح حسين | مسرحية أنا الرئيس

سيدي الرئيس – بعد التحية والسلام إنت مسئول عن بلد .. شهد التاريخ بإنها .. …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *