أخبار عاجلة
الرئيسية / أعماله / شعر غنائي / أغاني في أعمال درامية / أوبريت أجمل عروسة | سامح حسين و حنان مطاوع | مسرحية أنا الرئيس | الشاعر : خالد الشيباني

أوبريت أجمل عروسة | سامح حسين و حنان مطاوع | مسرحية أنا الرئيس | الشاعر : خالد الشيباني

المجاميع /

أجمل عروسة شافتها العين ..  م اللي اتحكي عنها دابوا ف هواها

ياما قلوب بيها مغرمين .. ولا حد عارف مين هينول رضاها

 اللي اتقال عن جمالها .. حاجة ولا ف الخيال

أخلافها مفيش مثالها .. والأصل عال العال

قول عن طيبتها زي م انت عايز

في الصبر والشرف تاخد جوايز

فستان فرحها جاهز .. والكوشة مستنياها

***

 الرأسمالي /

أنا .. أنا اللي لما أروح مكان .. الأذكياء يتنغنغوا

عندي الفلوس م لهاش عدد .. عقد الروتين بيا اتلغوا

 لو تبقى ليا هتوصلي ..  وتعيشي عيشة أبهه

على دنية العز أدخلي .. هتدوب دوب ف حبها

 ده اللي بيفهموا لعبتي .. جوه الهنا يتمرمغوا

 —-

العروسة / طب والغلابة اللي ظروفها ملطشة

الرأسمالي / قطع غيار للأغنياء .. م لهمش دول ف الفرفشة

 العروسة / طب والضعيف .. ليه كرامة ولا ملطشة

الرأسمالي / زمانا ده للأقوياء .. خليكي ناصحة ومطنشة

العروسة / متأسفة جدا مضطرة أرفض طلبك

برغم كل مميزاتك .. مش قادرة أحبك

_____

الاشتراكي /

أنا اللي بساوي بين الكل .. وكل كلامي عين العقل

شعاري كلنا واحد .. وعندي أهم حاجة العدل

 أنا اللي مطبق المساواة ..  محقق فكرة الوحدة    

أنا اللي السعادة معاه .. وجد وكلمتي واحدة

 في أي ظروف باعدي الخوف  وباتصرف وألاقي الحل

 —-

العروسة / كده الكسلان بيتساوى مع الشقيان

الاشتراكي / مدام ساكت وبيصقف .. بطاعته هيبقى أعلى كمان

 العروسة / نظام الكون أساسا مبني ع الدرجات

الاشتراكي /  م فيه درجات لرجالتي ..وفيه نياشين وفيه طبقات

العروسة / متأسفة جدا مضطرة أرفض طلبك

برغم كل مميزاتك .. مش قادرة أحبك

—-

المتطرف /

طريقي مدخل الجنة .. فسيري فيه ممتنة

اعيش ومنهجي وحيٌّ  كتاب الله والسنة

إذا شاركتني عمري .. وزين كفك الحنة

فوعد لا شقاء معي ولا همٌّ ولا فتنة 

العروسة / ومين قال إن دين الله .. طريقك بس 

المتطرف / لأني رايتي ديني .. وهذا في وضوح الشمس  

 العروسة / ولو فيه رأيي غير رأيك  .. في تفسير نص

المتطرف/  أنا الأتقى وتفسيري الصحيح .. متى نقيم العرس ؟

العروسة / متأسفة جدا مضطرة أرفض طلبك

برغم كل مميزاتك .. مش قادرة أحبك

_____

 

التحرري /

أهم حاجة الحرية .. هتبقى حرة وهابقى حر

ولو تكوني حبيبة ليا .. عمرك م هتعيشي معايا يوم مر

أنا عندي فكر حديث ومتطور .. والعلم عندي أهم م الهوا والمية

أنا إنسان حقيقي متحضر .. واللي تحبني بأشيلها ف عنيا

العروسة / وإن الحرية بزيادة بقت فوضى .. وشفت ساعتها ناس رافضة

التحرري / حبيبتي كله بالقوانين .. وبيها هاحكم القبضة

 العروسة / ما فيه ناس عاشوا بدماغك .. بينتحروا ..  ولا كانوا ف يوم سعدا

التحرري /  دي ناس طبيعتها مكتئبين .. ومشاعرهم كانت باردة

العروسة / متأسفة جدا مضطرة أرفض طلبك

برغم كل مميزاتك .. مش قادرة أحبك

 —

ابن مصر /

أنا آسف عشان جي كده متبهدل ..  خرجت هدومي مكوية .. ولابس أحلى ما ع الحبل

وإوعي تفكريني حد باستهبل .. فيه برة زحمة ومواصلات .. تخليني بجد اتشل

العروسة / مفيش داعي لأسفك ده ..  يا ريت تبدأ انا سامعاك

ابن مصر /  لا عندي فيلا ولا شقة ..

 ولكن اوضتي فوق السطح .. بأشوف الأهرمات فيها من الشباك

وحبي ليكي حب اكيد .. وعنهم ألف مرة يزيد

العروسة / يا ريت تشرحلي أفكارك .. وإيه السكة بالتحديد

ابن مصر / أنا عايز تعيشي ف عدل .. وناكل عيش بأسلوب سهل

ونرضي ربنا دايما ..  وفيه حرية بس بعقل

وناخد م الفراعنة حاجات .. وم الحضارات وم الديانات

ونرسم بكرة لولادنا ..  بيضحك بس بالحسابات

موافقة ..

العروسة / سيبني افكر

ابن مصر / قدامك سنتين مش اكتر

 —

المجاميع /

أجمل عروسة شافتها العين ..  م اللي اتحكي عنها دابوا ف هواها

ياما قلوب بيها مغرمين .. ولا حد عارف مين هينول رضاه

أوبريت : أجمل عروسة

الشاعر : خالد الشيباني

الملحن : وائل عقيد

مسرحية أنا الرئيس

للمؤلف : يوسف عوف  و المخرج : محسن رزق

شاهد أيضاً

نِمَر في بطايق | محمود معوض | مسلسل البارون

احنا نمر في بطايق .. قصتنا إيه مش فارق من كتر مبنتضايق مخنوقة الحيطان حوالينا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *